Momentico Sanferminero Lesakan

Joxe Luis eta Exteban, familiko "ahotsak" jota ederrak kantatu zituzten Lesakako Sanferminetan, Harizpeko bazkarian.
Hau aportazioa! (perkusioa batez ere)

Arbasoak liburua PDF formatuan

Arbasoak

Arozena-Mitxelena-Olaizola liburua izan zen 2009ko Olentzerotako sarrandarron oparia.

Paperean ez ezik, PDF formatuan irakur daiteke orain.

Arbasoak-Sarranazkenanet

Estitxu berriz ere Nafarroako bertsolari txapelketan

Hirugarren egin zuen Estitxu Arozenak 2010eko Nafarroako bertsolari txapelketaren finalean, Julio Soto eta Arkaitz Goikoetxearen atzetik.

Hiru urteko geldialdiaren ondotik, berriz ere animoa hartu eta bikain aritu zen Lesakan jokatutako finalean.

Igor bikain San Juango entrenatzaile eta arraunlari bezala

Joan den urtean TKE ligara igotzea lortu ondotik, denboraldi hasiera bikaina egiten ari da Pasai Donibaneko San Juan taldea, Igor Makazaga Arozena sarrandarraren gidaritzapean. Arraunean ere ari da Igor.

Horra Diario Vascon atera zen kronika.

Baztan-Bidasoaldeko XXIII. bertso-paper lehiaketan lehen saria Aitorrek

Baztan-Bidasoako XXIII. bertsopaper lehiaketa irabazi zuen Aitor Arotzenak

Iratiko Mendi-Mutilaren oroitzapenak

Doinua: Munduaren ilunabarra

1

Han genuen Amerika

bertze aldetik zirika;

Kontrabandoan irrika

zapelokerrak segika.

Hura urruna eta hau berriz

arriskutsu iritzita,

kontratistakin jarri genuen

herriko gazteek zita:

“Auñamendian zuhaitzak moztu,

gero zerra eta pika,

urtebetean, dirua egin

bero beroa patrika,

hemen ez denez Frantzialdean

hantxe duzue fabrika!”

2

Zinkuenta y uno dabila

udaberriaren bila

kantuz hasi da okila

laister dator apirila;

Maleta bete eta itxi dut

baserriko maratila

autobusean Orbaitzetara

gazte langile koadrila,

arduraduna gu konbentzitzen

izan genuen abila:

“Indar betean lanikan gabe

Gazte hemen zer habila!

Han behar dugu hire moduko

sasoiko mendi mutila!”.

3

Hemen dugu Orbaitzeta

Mendi artean gordeta

Bizkar gainean maleta

Ametsez ongi beteta;

elur artean, aitzur ta palaz

bidexkaren baten xerka

zubirik ez da, pinua botaz

gainditu dugu erreka

muga aldean guardiazibilek

galdegin dute karneta

egia erranda ez dute jarri

horretan bere arreta

nagusi jaunak azpiko diruz

hornituak ditu-eta.

4

Inguru dena arbola

eta haize zirimola

Iltzatuz hiru ohola

Osatu dugu etxola;

Aldi bateko hauxe da gure

kabia edo kaiola.

umela eta hezetasuna

lau aldetik dariola

ardo eta saldaz saiatu arren

ez da berotzen odola

gorputz barneko hozkirriari

buelta ezin eman inola

lehendik ere zailduak gaude,

ez zaigu aunitz axola.

5

Enkargatuak: “Arriba!”,

oihuka fuerte ari da

ilargiaren dizdira

goizaldeko lauak dira;

Ogi koxkorraz, gosaldu eta

bertzerikan gabe tira!

gazta muttur bat bere ondoan

izanen balu sikira!

Lan tresnak hartu eta bagoaz

ilunpe hortan mendira

irudipena: zain ditudala

arbolak neri begira

baina etxean utzia daukat

haienganako gupida.

6

Indarrez bortizki jota

zuhaitza lurrera bota

idiari lotu soka

eraman karrakiloka;

Mendian hori izaten dugu

eguneroko borroka

zerra, aizkora eta arpana

enborrarekin mokoka

amiltzen hasten denean berriz

ihes eginez saltoka

hainen lanbide gogorra nola

bekaizkeriz ez gorrota

baina gaitzerdi sakela behinpin

bete betea dago-ta.

7

Otordurako rantxua

Nahi adina garbantzua

Ondotik ardi antzua

Gixadoan, saldatzua;

Egunez egun izaten dugu

beti jaki berdintsua

nola ez dugu izanen bada

ia astero enpatxua

Horrelakotan sagarra ere

izaten da kapritxua,

halere ez dut inoiz somatzen

gosearen mehatsua

tripa asea, baina gogoan

amaren jaki goxua.

8

Hor Mendibe, Irati han

pinudian, hariztian

aipatu dut arestian

soldataren aitzakian;

baina atzendu ez dut eginen

nere bizitza guztian

bazkalondoan gertatu zena

abuztuaren zazpian

pinua eroriz nola joan zen

aizkoran azken kolpian

Begibeltzeko Juanito motza

harrapatuta azpian,

hil ondorengo mendekuaren

hondarreko autsikian.

9

Nere animo apala

indargabetuz doala

Jaungoikoaren magala

berak ezagut dezala;

Mendi mutilen lerro luzeak

zerraldoa daramala

negar malko bat eskapatzea

ez al da gauza normala?

Baina ezpainak gogor estutuz

eusteko eginahala

Otoitz artean, galdera hauxe

burura etorri zaidala:

Aski ote da lan honen truke

jasotzen dugun jornala?

10

Lurpean utziz laguna

berriz ere lan jarduna

egunerokotasuna

egiten zaigu astuna;

Ilun denean lanean hasi

lana uztean iluna

Udazkenean laburtuz doa

gutti guttika eguna

atzo joan zen, gaur da jadanik

abudo biharamuna

Urte erdiko neke bortitza

Gainean daramaguna

eta itzulera oraindik ere

ikusten da hain urruna!

11

Egutegiko orriak

Abendura ekarriak

Hor dira Eguberriak

itzultzeko egarriak;

berriro bueltan ekarri gaitu,

onartu gaitu herriak

xoxa freskoaz hornitu dugu

jan-edariz eztarriak

denak oihuka, denak kantuan

bozkariozko irriak

baina ez ahazteko Pirinioko

gertaera mingarriak

Juanito motzan andreak ditu

begiak gorri-gorriak.

12

Neguko zeru gorrixta,

trumoia eta tximista,

haize ufaden errista

elurrez zuri mendixka;

Etxe txokoko supazterretik

irriz egin diet hista,

baina munduan nork ez du inoiz

lasaitasuna arriska

jakinda ere, suertatzen dela

ezpondatikan irrista

bizitza hobe baten gogoak

utzi ezinik erdizka

udaberria hurbil dugunez

berriz Iratira bista.